2Cor 2 | BOJ | STEP | Ariya e olo Korin qureq bosai. Di kiyaqa? E are qalem, e niŋgi qa bosiy ololo niŋgi are gulube eŋgwai di bolesai.

2 Corinthians 2

1 Ariya e olo Korin qureq bosai. Di kiyaqa? E are qalem, e niŋgi qa bosiy ololo niŋgi are gulube eŋgwai di bolesai. 2 E niŋgi are gulube eŋgwai di tamo yai na ijo are olo boletetbqas? Niŋgi segi na ijo are boletbqa kere. 3 Deqa e niŋgi qa olo bosiy are gulube oqa uratonum. Utru deqa e nami anjam bei di neŋgreŋyosim niŋgi qa qariŋyem. O was qu, e qalieonum, e iŋgi bei qa areboleboleibqas di niŋgi kalil dego e ti koba na areboleboleigwas. 4 Bole, e are gulube ti akam ti sosim deqa anjam di neŋgreŋyem. Ariya e niŋgi are gulube eŋgwa osim anjam di neŋgreŋyosai. E niŋgi tulaŋ qalaqalaiŋgeqnum di niŋgi qalieqajqa deqa are qalsim anjam di neŋgreŋyem.

Pol na Korin naŋgi minjrej, “Tamo qujai nami une yej qaji di niŋgi na olo une kobotetiye.”

5 Tamo qujai a na niŋgi qudei are gulube eŋgej. A e are gulube ebosai. Deqa e aqa une qa anjam siŋgila koba minjqasai. Ariya e na niŋgi endegsi merŋgwai. Tamo di a niŋgi kalil are gulube eŋgej. 6 Ariya nuŋgo ambleq di tamo gargekoba naŋgi tamo di aqa une qa minjsib awai uge yeb di kereqo. 7 Deqa bini niŋgi olo kumbra bulyosib aqa une kobotetosib aqa are latetiye. Yim a are boleqas. Niŋgi degyqasai di a olo are tulaŋ gulube ti so uge. 8 Deqa niŋgi a olo qalaqalaiyo kumbra osoryoqniye. Yim a qalieqas, niŋgi na a torei qoreiyosai. 9 Niŋgi ijo anjam kalil quoqnsib dauryeqnub kio sai kio di e qalieqajqa deqa e nami anjam di neŋgreŋyosim niŋgi qa qariŋyem. 10 Ariya niŋgi na tamo di aqa une kobotetqab di e kamba dego aqa une kobotetqai. E tamo bei aqa une kobotetqai di e Kristus aqa ŋamgalaq dia kobotetqai. E niŋgi aqaryaiŋgwa osiy deqa kobotetqai. 11 E degyqai. Di kiyaqa? Tamo uge Satan a na iga gisaŋgosim ugeugeigo uge. Satan aqa areqalo ti aqa uli kumbra ti di iga bole qalieonum.

Pol na Taitus unqa marej

12 Ariya was qu, e Kristus aqa anjam bole palontqa osimqa walwelosim gilsim Troas qureq di brantem. Brantonam Tamo Koba Qotei na gam waqtetbonaqa e dia aqa wau ojoqnem. 13 Ariya e dia ijo was Taitus itosai deqa e a qa are koba qaloqnem. Deqa e Troas tamo uŋgasari naŋgi olo uratnjrsim Masedonia sawaq gilem.

Qotei aqa siŋgila na Yesus aqa wau tamo naŋgi qoto buŋyeqnub

14 Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul. 15 Od, iga segi qurem quleq bul Kristus na Qotei atraiyeqnu qaji. Quleq di sawa sawa kalilq giloqnsiqa tamo uŋgasari Qotei na eleŋeqnu qaji naŋgi ti tamo uŋgasari padalqa gamq di unub qaji naŋgi ti naŋgoq aieqnu. 16 Quleq dena tamo uŋgasari padalqa gamq di unub qaji naŋgi moiotnjreqnu. Ariya quleq dena tamo uŋgasari Qotei na eleŋeqnu qaji naŋgi olo ŋambile enjreqnu. O was qu, tamo yai naŋgi wau di yqa kere? Tamo deqaji bei saiqoji. 17 Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.